కరీంనగర్‌లోని ప్రముఖ ఫాస్ట్‌ఫుడ్ కేంద్రం KFC అవుట్‌లెట్‌లో గురువారం ఫుడ్ సేఫ్టీ అధికారులు మెరుపు దాడులు నిర్వహించారు. నాణ్యత లేని నూనెను ఉపయోగిస్తున్నట్లు గుర్తించిన అధికారులు.. సుమారు 90 కేజీల నిల్వలను స్వాధీనం చేసుకున్నారు. ఈ తనిఖీల సమయంలో నిర్వాహకులు అధికారులతో వాగ్వాదానికి దిగడమే కాకుండా, మీడియా ప్రతినిధులను లోపలికి రాకుండా అడ్డుకున్నారు. ఫుడ్ సేఫ్టీ అధికారి అంకిత్ రెడ్డి ఆధ్వర్యంలో జరిగిన ఈ తనిఖీల్లో, ఆహార పదార్థాలు, ముడిసరుకుల నమూనాలను సేకరించి ల్యాబ్‌కు తరలించారు. ల్యాబ్ నివేదిక ఆధారంగా తదుపరి చర్యలు ఉంటాయని అధికారులు స్పష్టం చేశారు.