கோவை: மாணவர்கள் அரசு விடுதியில் சேர விண்ணப்பிக்கலாம்

பிற்படுத்தப்பட்டோர் மற்றும் மிகப்பிற்படுத்தப்பட்டோர் மாணவர்கள் அரசு விடுதியில் சேருவதற்கான விண்ணப்பங்கள் வரவேற்கப்படுகின்றன. இதுகுறித்து கோவை மாவட்ட நிர்வாகம் இன்று வெளியிட்டுள்ள அறிவிப்பில், பிற்படுத்தப்பட்டோர், மிகப்பிற்படுத்தப்பட்டோர் மற்றும் சீர்மரபினர் சேர்ந்த மாணவ, மாணவியருக்கு அரசு விடுதிகளில் தங்கும் வாய்ப்பு வழங்கப்படுவதாக கூறப்பட்டுள்ளது. 

பள்ளி மாணவர்களுக்கான விடுதிகளில் 4ம் வகுப்பு முதல் 12ம் வகுப்பு வரை படிக்கும் மாணவர்கள் சேரலாம். அதேபோல், கல்லூரி விடுதிகளில் பட்டப்படிப்பு, பட்ட மேற்படிப்பு, ஐ.டி.ஐ., மற்றும் பாலிடெக்னிக் போன்ற தொழில்நுட்பப் படிப்புகளில் சேரும் மாணவர்களும் தகுதியுடையவர்களாகக் கருதப்படுவர். விடுதிகளில் மூன்று வேளை உணவுடன் கூடிய தங்கும் வசதி இலவசமாக வழங்கப்படும். இந்த நலத்திட்டத்திற்காக விண்ணப்பிக்க, மாணவரின் பெற்றோர் அல்லது பாதுகாவலரின் ஆண்டு வருவாய் இரண்டு லட்சத்தை மிஞ்சக்கூடாது. 

விண்ணப்பப் படிவங்களை, தொடர்புடைய விடுதி காப்பாளர் அல்லது மாவட்ட பிற்படுத்தப்பட்டோர் மற்றும் சிறுபான்மையினர் நல அலுவலகம் (மாவட்ட கலெக்டர் அலுவலகத்தில் செயல்படுகிறது) இல் பெற்றுக்கொள்ளலாம். ஜூலை 15ஆம் தேதிக்குள் விண்ணப்பிக்க வேண்டும் என்று அறிவுறுத்தப்பட்டுள்ளனர்.