200 ஆண்டுகால கந்தூரி விழா: ஈரோட்டில் கோலாகல கூட்டுப் பிரார்த்தனை

ஈரோடு லக்காபுரம் புதிய பேருந்து நிலையம் பின்புறமுள்ள கந்தூரிக்காட்டில், 200 ஆண்டுகால வரலாற்றுச் சிறப்புமிக்க கந்தூரி விழா கூட்டுப் பிரார்த்தனை நேற்று கோலாகலமாக நடைபெற்றது. சுமார் 200 ஆண்டுகளுக்கு முன்பு ஈரோட்டில் காலரா நோய் பரவியபோது, மக்கள் இந்த இடத்தில் தங்கிப் பிரார்த்தனை செய்ததால் நோய் நீங்கியது. அதன் நினைவாக, ஒவ்வொரு ஆண்டும் கார்த்திகை மாதத்தில் இந்த நிகழ்வு நடத்தப்படுகிறது. கறி கடை ஜியா தலைமையில், லக்காபுரத்தைச் சார்ந்த எல்.என். அபுதாஹிர் உள்ளிட்டோர் ஏற்பாடு செய்த இந்த விழாவில், ஈரோடு, கரூர், கோபி உள்ளிட்ட பல பகுதிகளில் இருந்து ஆயிரக்கணக்கான ஆண்களும் பெண்களும் கலந்து கொண்டனர். இமாம் அமானி ஹஜ்ரத் அவர்கள், நாடு நலம் பெறவும், மக்கள் பிரச்சினைகள் தீரவும் உருக்கமாகப் பிரார்த்தனை செய்தார். நூற்றுக்கணக்கான குடில்கள் அமைத்துச் சமைக்கப்பட்ட உணவுகளை மக்களுக்குத் தானமளித்து, தாங்கள் எதையும் எடுத்துச் செல்லாமல் மக்கள் பாரம்பரியத்தைக் கடைப்பிடித்தனர். காங்கிரஸ் பிரமுகர்களான கே.என். பாஷா, ம. முகமது அர்சத் உள்ளிட்டோர் பங்கேற்றனர்.