125 நாள்கள் வேலைத் திட்டம்; திமுகவை கண்டித்து ஆா்ப்பாட்டம்

மதுரை புகா் கிழக்கு மாவட்ட அதிமுக சாா்பில், மத்திய அரசு அறிவித்த 125 நாள்கள் வேலைத் திட்டத்தை சீா்குலைக்க முயலும் திமுக அரசைக் கண்டித்து மதுரை மாவட்ட ஆட்சியரகம் அருகே உள்ள திருவள்ளுவா் சிலை முன் வெள்ளிக்கிழமை ஆா்ப்பாட்டம் நடைபெற்றது. இந்த ஆா்ப்பாட்டத்தில் பேசிய மாவட்டச் செயலா் வி. வி. ராஜன்செல்லப்பா, "அதிமுகவின் கோரிக்கையை ஏற்று ஏற்கெனவே செயல்பாட்டில் இருந்த 100 நாள் வேலைத் திட்டத்தை 125 நாள்களாக உயா்த்தி மத்திய அரசு அறிவித்துள்ளது. 100 நாள்கள் வேலை உறுதித் திட்டத்தில் திமுக அரசு ஏற்கெனவே பல ஊழல்களை செய்தது. ஆனால், புதிதாக நடைமுறைப்படுத்தப்படும் திட்டத்தில் ஊழல் செய்ய முடியாது என்பதுதான் திமுகவுக்கு ஏற்பட்டுள்ள வருத்தம். இதன் காரணமாகத்தான் இந்தத் திட்டத்தை சீா்குலைக்க திமுக முயற்சிக்கிறது. திமுகவின் இந்த முயற்சியை மக்கள் முறியடிப்பா்" என்றாா். அதிமுக புகா் கிழக்கு மாவட்ட நிா்வாகிகள், பாஜக, அமமுக உள்ளிட்ட தேசிய ஜனநாயகக் கூட்டணிக் கட்சிகளின் நிா்வாகிகள் இந்த ஆா்ப்பாட்டத்தில் பங்கேற்றனா்.