அதிகரிக்கும் விபத்துகள் – பாதுகாப்பு ஏற்பாடுகள்

சிவகங்கை மாவட்டம் சிவகங்கை பேருந்து நிலையம் சுற்றுவட்டாரப் பகுதியில் அதிகரித்து வரும் சாலை விபத்துகளைக் கட்டுப்படுத்தும் நோக்கில், போக்குவரத்து மற்றும் நெடுஞ்சாலைத் துறையினர் புதிய பாதுகாப்பு நடவடிக்கைகளை மேற்கொண்டுள்ளனர். பேருந்து நிலையம் அருகே, பயணிகள் மற்றும் பொதுமக்கள் அதிகம் நடமாடும் சாலைகளில் வாகனங்கள் அதிவேகமாக செல்வதாலும், கவனக்குறைவாலும் அடிக்கடி விபத்துகள் நிகழ்ந்து வருவதாகக் கூறப்படுகிறது. இதனைத் தடுக்கும் வகையில், சாலையின் நடுப்பகுதியில் பிரதிபலிக்கும் (Reflective) பாதுகாப்பு தடுப்புகள் அமைக்கப்பட்டுள்ளன. இதன் மூலம் வாகன ஓட்டிகளுக்கு எச்சரிக்கை கிடைப்பதுடன், சாலைப் பிரிவுகள் தெளிவாகத் தெரிவதால் விபத்துகள் குறையும் என அதிகாரிகள் தெரிவிக்கின்றனர். இரவு நேரங்களிலும், மழைக்காலங்களிலும் சாலை தெளிவாகத் தெரியாததால் ஏற்படும் விபத்துகளைக் கட்டுப்படுத்த இந்த நடவடிக்கை பயனுள்ளதாக இருக்கும் என நம்பப்படுகிறது. பொதுமக்கள் மற்றும் சமூக ஆர்வலர்கள் இந்த பாதுகாப்பு ஏற்பாடுகள் தொடர்ச்சியாகப் பராமரிக்கப்பட வேண்டும் என்றும், தேவையான இடங்களில் மேலும் பாதுகாப்பு வசதிகள் ஏற்படுத்தப்பட வேண்டும் என்றும் கோரிக்கை விடுத்துள்ளனர்.