தஞ்சாவூர்: மாவட்ட அளவில் பள்ளி மாணவர்களுக்கு நீச்சல் போட்டி

தஞ்சை அன்னை சத்யா விளையாட்டு அரங்கில் மாவட்ட அளவில் பள்ளி மாணவர்களுக்கு இடையேயான நீச்சல் போட்டி நடைபெற்றது. இதில் 200-க்கும் மேற்பட்ட வீரர் வீராங்கனைகள் கலந்து கொண்டனர். 

தஞ்சையில் உள்ள அன்னை சத்யா விளையாட்டு அரங்கத்தில் உள்ள நீச்சல் குளத்தில் பள்ளி மாணவர்களுக்கு இடையேயான மாவட்ட அளவிலான நீச்சல் போட்டி மாவட்ட நீச்சல் கழகம் சார்பில் நடைபெற்றது. இதில் 6 வயது முதல் 18 வயது வரையிலான பள்ளி மாணவ மாணவிகள் கலந்து கொண்டனர். போட்டிகள் பிரீஸ்டைல், பேக்ஸ்ட்ரோக், பட்டர்பிளை என 10 பிரிவுகளாக நடைபெற்றது. இதில் தஞ்சை மாவட்டத்தில் உள்ள பல்வேறு பள்ளிகளைச் சேர்ந்த மாணவ, மாணவிகள் 200-க்கும் மேற்பட்டவர்கள் கலந்து கொண்டனர். போட்டிகளை மாவட்ட விளையாட்டு அதிகாரி டேவிட் டேனியல் தொடங்கி வைத்து, வெற்றி பெற்ற மாணவ, மாணவிகளுக்கு பரிசுகளை வழங்கினார். 

இதில் ஒவ்வொரு பிரிவிலும் முதல் 3 இடங்களை பிடித்த மாணவ, மாணவிகளுக்கு பதக்கம் மற்றும் சான்றிதழ்கள் வழங்கப்பட்டன. பரிசளிப்பு விழாவில் மாவட்ட நீச்சல் பயிற்சியாளர் ரஞ்சித், நீச்சல் கழகத்தைச் சேர்ந்த தம்பா, கோவி, மோகன், சந்தோஷ், சசிகுமார், ராஜேந்திரன் மற்றும் நீச்சல் வீரர், வீராங்கனைகள், பெற்றோர்கள் கலந்து கொண்டனர்.