ஆயிரம் ஆண்டுகள் பழைமையான சுடுமண் பெண் தெய்வ சிலை கண்டெடுப்பு

தூத்துக்குடி மாவட்டத்தின் தொல்லியல் களமான பட்டினமருதூரில், சுமார் ஆயிரம் ஆண்டுகள் பழமையான சுடுமண் பெண் தெய்வ சிலை கண்டெடுக்கப்பட்டுள்ளது. 5.4 செ.மீ உயரமுள்ள இந்த சிலை, ஐம்பெரும் காப்பியங்களில் குறிப்பிடப்படும் சம்பாபதி அம்மன் உருவத்தைப் போல் இருப்பதாக தொல்லியல் ஆர்வலர் பெ. ராஜேஷ் செல்வரதி தெரிவித்துள்ளார். மேலும், சங்ககால தொல் தமிழ் எழுத்துகள் பொறிக்கப்பட்ட, முக்கோண வடிவ வாய்ச்சி கருவியும் கண்டெடுக்கப்பட்டுள்ளது. இந்த கண்டுபிடிப்புகள், பாண்டியர் கால கடல் வாழ்வு, பவளப்பாறை மீன்வளம் மற்றும் தமிழ் நாகரிகத்தின் வளர்ச்சி குறித்து புதிய வெளிச்சம் வீசக்கூடியவை என அவர் குறிப்பிட்டுள்ளார். மாவட்ட தொல்லியல் துறையினர் இதை உறுதிப்படுத்தி, விரைவில் பட்டினமருதூரில் அகழாய்வு பணி தொடங்கப்படும் எனத் தெரிவித்துள்ளனர்.