అమలాపురం: ఆర్టీసీ బస్సు ఢీకొని కారు డ్రైవర్ మృతి

అమలాపురం పట్టణంలోని హెచ్పీ గ్యాస్ కంపెనీ వద్ద సోమవారం సాయంత్రం జరిగిన రోడ్డు ప్రమాదంలో రేవు దినేష్ కుమార్ (28) అనే యువకుడు మృతి చెందారు. అల్లవరం మండలం గోడి గ్రామానికి చెందిన దినేష్ కుమార్, కారు డ్రైవర్‌గా పనిచేస్తూ నారాయణపేటలో నివాసం ఉంటున్నారు. గ్యాస్ సిలిండర్ కోసం ద్విచక్ర వాహనంపై వెళ్తుండగా, అమలాపురం నుండి సఖినేటిపల్లి వెళ్తున్న ఆర్టీసీ బస్సు ఆయనను బలంగా ఢీకొంది. ఈ ప్రమాదంలో దినేష్ కుమార్ అక్కడికక్కడే మృతి చెందగా, మృతదేహాన్ని పోస్టుమార్టం నిమిత్తం స్థానిక ప్రాంతీయ ఆసుపత్రికి తరలించారు.