జమ్ముకశ్మీర్ ఆరోగ్య శాఖలో 'పోలియో ఫ్రీ పాకిస్తాన్' నినాదం కలకలం

జమ్ముకశ్మీర్ ఆరోగ్య శాఖలో ఊహించని పరిణామం తీవ్ర కలకలం రేపింది. అధికారిక కార్యక్రమానికి సంబంధించిన ఒక కరపత్రంలో 'పోలియో ఫ్రీ పాకిస్తాన్' అనే నినాదం కనిపించడంతో అధికారులు ఉలిక్కిపడ్డారు. రాజౌరి చీఫ్ మెడికల్ ఆఫీసర్ (సీఎంఓ) పల్స్ పోలియో ఇమ్యునైజేషన్ ప్రోగ్రామ్-2026కు సంబంధించిన ఈ వివాదాస్పద కరపత్రంపై ఉన్నతాధికారులు అత్యవసర విచారణకు ఆదేశించారు. బ్లాక్ మెడికల్ ఆఫీసర్ (బీఎంఓ) కార్యాలయం ద్వారా ప్రచురితమైన ఈ పత్రంపై సదరు బీఎంఓకు షోకాజ్ నోటీసు జారీ చేసి, 24 గంటల్లోగా వివరణ ఇవ్వాలని ఆదేశించారు. ఈ లోగో, నినాదానికి జమ్ముకశ్మీర్ ఆరోగ్య సంరక్షణ, వైద్య విద్యా విభాగంతో కానీ, కేంద్ర ఆరోగ్య, కుటుంబ సంక్షేమ మంత్రిత్వ శాఖతో కానీ ఎలాంటి సంబంధం లేదని ప్రభుత్వం స్పష్టం చేసింది.