ఆత్మకూరు మండలంలో రూ. లక్ష 21 వేలు పలికిన లడ్డు

నెల్లూరు జిల్లా ఆత్మకూరు మండలంలోని బోయల చిరువెళ్ల గ్రామంలో వినాయక చవితి వేడుకలు ఘనంగా నిర్వహించారు. పడమటి విధి యూత్ ఆధ్వర్యంలో వినాయకుడిని మండపంలో కొలువుదీర్చి ప్రత్యేక పూజలు చేశారు. ఈ సందర్భంగా ఆదివారం రాత్రి నిర్వహించిన వినాయకుడి లడ్డూ వేలం పాటలో ఆసక్తికర పరిణామం చోటుచేసుకుంది. స్వామివారి వద్ద ఉంచిన లడ్డూకు వేలం నిర్వహించగా పోటాపోటీగా సాగిన వేలం చివరకు రూ. లక్ష 21 వేల వద్ద ముగిసింది. ఆ గ్రామ రావూరు వెంకటకృష్ణ రెడ్డి ఈ లడ్డూను దక్కించుకున్నారు. గ్రామస్తుల ఆధ్వర్యంలో బాణాసంచాల మధ్య గణేశుని లడ్డుని అందజేశారు.