విశాఖ: క్యాన్సర్ రహిత సమాజమే లక్ష్యం

ప్రపంచ క్యాన్సర్ దినోత్సవం సందర్భంగా విశాఖలోని మహాత్మా గాంధీ క్యాన్సర్ ఆసుపత్రి ఆధ్వర్యంలో ఆదివారం నిర్వహించిన 'వాకథాన్'లో విశాఖ దక్షిణ ఎమ్మెల్యే వంశీకృష్ణ శ్రీనివాస్ పాల్గొన్నారు. రాష్ట్ర ఆరోగ్య శాఖ మంత్రి సత్యకుమార్ యాదవ్ ముఖ్య అతిథిగా హాజరైన ఈ ర్యాలీ కాళీమాత ఆలయం నుండి వైఎంసీఏ వరకు కొనసాగింది. ఈ సందర్భంగా ఎమ్మెల్యే మాట్లాడుతూ, క్యాన్సర్ పట్ల ప్రజల్లో అవగాహన పెరగాలని, ముందస్తు పరీక్షల ద్వారా వ్యాధిని నివారించవచ్చని, ఆరోగ్యకరమైన జీవనశైలిని అలవర్చుకోవాలని పిలుపునిచ్చారు. ఉత్తర నియోజకవర్గ ఎమ్మెల్యే విష్ణు కుమార్ రాజు, ఇతర ప్రజాప్రతినిధులు, వైద్య నిపుణులు, విద్యార్థులు పాల్గొన్నారు.