రైలు చక్రాలు పూర్తి గుండ్రంగా ఉండవు తెలుసా?

రైలు చక్రాలు పూర్తిగా గుండ్రంగా కాకుండా స్వల్పంగా కోన్‌ ఆకారంలో ఉంటాయి. మలుపుల్లో బయట పట్టా పొడవు ఎక్కువగా, లోపలి పట్టా పొడవు తక్కువగా ఉంటుంది. ఒకే యాక్సిల్‌కు అనుసంధానమైన చక్రాలు ఒకేసారి తిరుగుతాయి. కోన్‌ ఆకారం వల్ల లోపలి వైపు చక్రం తక్కువ దూరం, బయటి వైపు చక్రం ఎక్కువ దూరం ప్రయాణించి, వేర్వేరు దూరాలను సులభంగా కవర్ చేస్తాయి. దీనివల్ల చక్రాలు, పట్టాలు అరిగిపోవడం, కీచుమనే శబ్దం తగ్గుతాయి. చక్రాలు పట్టాలపై కొద్దిగా పక్కకు కదిలినప్పుడు వ్యాసాల్లో తేడా ఏర్పడి, అవి మళ్లీ పట్టాల మధ్యకు వచ్చేలా పునరుద్ధరణ ప్రభావం ఏర్పడుతుంది. ఇది రైలు నేరుగా వెళ్లేటప్పుడు స్థిరంగా ఉండటానికి సహాయపడుతుంది.