బీఆర్ఎస్ కనుమరుగు: కేసీఆర్ కుటుంబంపై సీఎం రేవంత్ రెడ్డి సంచలన వ్యాఖ్యలు

తెలంగాణ రాజకీయాల్లో ముఖ్యమంత్రి రేవంత్ రెడ్డి చేసిన వ్యాఖ్యలు సంచలనం రేపుతున్నాయి. మీడియా సమావేశంలో ఆయన బీఆర్ఎస్ అధినేత కేసీఆర్ కుటుంబంపై, కాళేశ్వరం ప్రాజెక్టు అవినీతిపై విమర్శలు చేశారు. రాష్ట్ర రాజకీయాల్లో బీఆర్ఎస్ కనుమరుగవుతుందని, ఆ పార్టీని చనిపోయిన శవంతో పోల్చారు. కవిత కొత్త పార్టీ పెడతారనే ప్రచారాలపై స్పందిస్తూ, రాష్ట్రంలో కొత్త పార్టీకి చోటు లేదని, ఉన్న పార్టీ ఉంటుందో ఊడుతుందో తెలియని పరిస్థితి ఉందని ఎద్దేవా చేశారు. కేసీఆర్ ఆరోగ్యంపై వస్తున్న వార్తలపై స్పందిస్తూ, తన ప్రత్యర్థి ఆరోగ్యంగా ఉండాలని కోరుకుంటానని, అయితే కేసీఆర్ కుటుంబ సభ్యులే ఆయన మరణాన్ని కోరుకుంటున్నారని సంచలన వ్యాఖ్యలు చేశారు. అధికారాన్ని అడ్డం పెట్టుకుని ప్రజలను విస్మరించడం వల్లే వారు ఓడిపోయారని, వారసత్వ సంపద, పదవుల కోసమే ఆ కుటుంబంలో ఆరాటం మొదలైందని పేర్కొన్నారు.