ప్రపంచ వాతావరణ సంస్థ ప్రకారం, ఈ ఏడాది మిగిలిన కాలంలో ఎల్ నినో తీవ్రత మరింత పెరిగే అవకాశం ఉంది. దీని ప్రభావంతో ప్రపంచవ్యాప్తంగా విపరీతమైన వాతావరణ మార్పులు సంభవిస్తాయని, ఇది రికార్డు స్థాయి ఎల్ నినో కావచ్చని శాస్త్రవేత్తలు ఆందోళన వ్యక్తం చేశారు. పసిఫిక్ మహాసముద్రంలో ఉపరితల నీటి ఉష్ణోగ్రతలు అసాధారణంగా పెరగడం, భారీ ఉష్ణ తరంగాలు తూర్పు వైపుగా కదలడం దీనికి కారణాలు. ఇప్పటికే వాతావరణ మార్పులతో సతమతమవుతున్న ప్రపంచంపై ఎల్ నినో ఆజ్యం పోస్తుందని, దీని ప్రభావాలు వేగంగా వ్యాపిస్తాయని ఐక్యరాజ్యసమితి సెక్రటరీ జనరల్ ఆంటోనియో గుటెర్రెస్ హెచ్చరించారు.