నారాయణపేట: పత్తి మిల్లులో అగ్ని ప్రమాదంపై అనుమానాలు
శుక్రవారం వడ్డెవాట్ చౌరస్తాలోని పత్తి మిల్లులో అగ్నిప్రమాదం సంభవించి సుమారు లక్ష రూపాయల నష్టం జరిగినట్లు మిల్లు యజమాని తెలిపారు. యంత్రాలు వేడెక్కడం వల్ల మంటలు చెలరేగాయని, అగ్నిమాపక సిబ్బంది మంటలను అదుపులోకి తెచ్చారని పేర్కొన్నారు. గత ఏడాది కూడా ఇదే మిల్లులో అగ్నిప్రమాదం జరిగిందని, అప్పట్లో తక్కువ దర్యాప్తుతో ఇన్సూరెన్స్ పొందినట్లు ఆరోపణలున్నాయి. గతంలో బ్యాంకు లోన్లు, ధాన్యం కొనుగోలులో అవకతవకలపై కేసులు ఎదుర్కొన్నట్లు సమాచారం. ఈ ఏడాది జరిగిన అగ్నిప్రమాదంపై మార్కెట్ వర్గాల్లో అనుమానాలు వ్యక్తమవుతున్నాయి, ఇన్సూరెన్స్ కోసం ప్రయత్నిస్తున్నారని ఆరోపణలున్నాయి. జిన్నింగ్ మిల్లుల్లో తరచూ జరుగుతున్న అగ్నిప్రమాదాలపై లోతైన దర్యాప్తు చేయాలని వ్యాపారస్తులు, ప్రజలు కోరుతున్నారు.
